Skapandi nemendur

Í Suðurhlíðarskóla er lögð áhersla á það að mennta börn til þess að verða SKAPANDI einstaklingar.

Hvað gerir skólinn til að stuðla að því að börnin verði skapandi?
Blómlegt tónlistarstarf fer fram í skólanum. Sönghópar og hljómsveitir verða til, oftar en ekki með aðstoð kennara, og fá tækifæri til að koma fram á skemmtunum skólans og við önnur tækifæri. Um hver jól bjóða nemendur og kennarar til glæsilegrar jólasamkomu. Á undanförnum árum hafa nemendur fært upp leikrit, söngleik, tónleika og ýmislegt fleira á jólasamkomum skólans.
Nemendum gefst kostur á tónlistarnámi í skólanum. Fiðlu- og píanókennari koma nokkrum sinnum í viku í skólann og bjóða upp á einkatíma í hljóðfæraleik. Tónlistarnámið fer fram á skólatíma eða í lok skóladags þannig að nemendur geta stundað sitt tónlistarnám án þess að þurfa að ferðast langar leiðir eða glíma við óhentugar tímasetningar.
Mikil áhersla er lögð á listsköpun í skólanum og fá nemendur tækifæri til að spreyta sig í myndmennt, textílmennt og smíðum auk þess sem boðið er upp á valnámskeið í efri bekkjum eftir því hvaða áhugi er fyrir hendi hverju sinni. Til dæmis hefur verið boðið upp á valnámskeið í skrautskrift og myndlist.
Í efri bekkjum er starfandi nemendafélag og þar fá nemendur tækifæri til að stíga sín fyrstu skref í að skipuleggja eigin skemmtanir og uppákomur. Kosið er í nemendaráð á hverju hausti og þar fá nemendur tækifæri til að læra að vera leiðtogar, kynnast grunnatriðum í fjármálum og læra hagnýta skipulagningu.
Foreldrum gefst kostur á því að koma í skólann og segja frá störfum sínum eða áhugamálum sem liður í starfskynningu eldri bekkja eða sem innlegg í kennslu annarra námsgreina. Þannig fá nemendur innsýn og innblástur sem nýtist þeim í að móta hugmyndir um eigin framtíð.