Einkaskóli

Suðurhlíðarskóli er EINKASKÓLI í Reykjavík á grunnskólastigi

Hvað er einkaskóli og hverju breytir það að skólinn er einkaskóli?
Einkaskóli, eða það sem nú er frekar kallaður sjálfstætt starfandi skóli, er skóli sem er rekinn og starfræktur af einkaaðilum í stað þess að vera rekinn af hinu opinbera. Grunnskólar eru reknir af sveitarfélögum, en einkaskólar á grunnskólastigi eru reknir af einkaaðilum. Nokkur hefð er fyrir rekstri einkaskóla á Íslandi og má þar nefna barnaskóla Aðventista, fyrirrennara Suðurhlíðarskóla, sem rekinn hefur verið frá árinu 1905, Skóla Ísaks Jónssonar sem hóf starfsemi árið 1926, Landakotsskóla sem hefur verið rekinn frá árinu 1896, og ýmsa fleiri skóla sem hafa verið starfræktir um lengri eða skemmri tíma.
Suðurhlíðarskóli er þátttakandi í Samtökum sjálfstæðra skóla.
Í Suðurhlíðarskóla er uppfyllt lögbundin skólaskylda, en þar sem skólinn er sjálfstæður hefur hann sveigjanleika til framsækni í kennslu og námsframboði. Lögð er áhersla á að veita fyrsta flokks menntun samkvæmt aðalnámskrá, en auk þess að leggja áherslu á persónulegan þroska hvers og eins með því að bjóða upp á ýmiskonar viðbótarþjónustu og skapa umhverfi þar sem einstaklingurinn fær að blómstra og þroskast þannig að hann verði heilsteyptur og skapandi.

Eru skólagjöld í Suðurhlíðarskóla?
Sveitarfélögin greiða um 70% af rekstrarkostnaði einkaskóla. Þetta þýðir að Suðurhlíðarskóli, eins og aðrir einkareknir grunnskólar, þarf að taka skólagjöld til að brúa bilið milli framlags sveitarfélaga og rekstrarkostnaðar. Skólagjöld fyrir nám í Suðurhlíðarskóla árið 2008-2009 verða sem hér segir miðað við jafnar greiðslur yfir almanaksárið:
Fyrir nemendur 1.-4. bekkjar: 8.400 kr. á mánuði
Fyrir nemendur 5.-10. bekkjar: 18.100 kr. á mánuði
Systkinaafsláttur er 30% fyrir annað barn og 50% fyrir þriðja.
Boðið er upp á lengda viðveru fyrir börn í 1.-4. bekk. Gjald fyrir þessa þjónustu er 4.900 kr. á mánuði yfir skólaárið.
Skólagjöld eru endurskoðuð ár hvert í apríl og taka breytingar mið af breytingum í launavísitölu. Breytingar á skólagjöldum taka gildi í upphafi næsta skólaárs.